© All rights reserved 2011 -  2017      Djispi Productions      Web design by Cathleen Giterson

Djis un Pensamentu

Un E-magazine  pa inspirá, eduká, konsientisá i entretené

Bon Biní
Bienvenido
Welcome
Welkom Djispi

Buki: Djis un poema

Intro

Dedikatorio

Kontenido

Kolofòn

Prólogo

Introdukshon

Promo

Flyer

Kaft dilanti

Kaft patras

Inougurashon

Premio UNESCO pa idioma materno papiamentu

Esaki ta e rúbrika ku kada bes ta presentá un poema for di e buki  Djis un Pensamentu. Kolekshon di poesia i prosa poétiko. Tomo I.


_____________________________________________________________________


Djis un poema

Kumpra buki



BUY  BOOKS /CD
NOW!

Bishita di outor na SKAIH

Un 31 di dezèmber di aña dos mil i piku

tur hende tabata en espera di e bataya internashonal.


Dos bòksdó di taya mundial lo bringa kontra otro

durante e último minütnan dje espektákulo tan sperá.


Tenshon a kuminsá for di ora bèl a zona

i dos kurpa yen di brio a bula drenta rin.


Bòsh’i hende a bola bin pa presensiá e suseso

pa sa ta ken ta ken i ta ken t’esun.


Niun di ningun no ker a baha kabes pa otro

ora rèfri a proklamá: ‘Aña Nobo versus Aña Bieu.’


Stèmnan djaleu tabata grita ora a bisa

ku Aña Bieu ta na shòrt kòrá i Aña Nobo na shòrt bèrdè.


I manera ta riba kuèrdè shòrt bèrdè a kuminsá move pia

miéntras kòrá poko konfuso tabata para wak.


Lusnan di kodak a kuminsá flèsh na granèl.

I bèl di promé rònt a pone e bòksdónan aserká.


Bèrdè ta promé ku a ataká ku yudansa di tremendo derechaso,

siguí pa un lèft di sorpresa ku a pone kòrá tolondrá.


Sinembargo eksperensia a destaká pasó kòrá pa bieu ku e por ta

a zembla bèrdè un uppercut ku a shangrin’é.


Kònòpi tabata paresé riba kara i pechu di kòrá

pero esaki a wanta duru danki na e alimento di henter aña largu.


Durante e tempu ei el a kome masbangu, tutu, kadushi, mangusá,

yambo, funchi, sòpitu, vlatap i su tan gustá zjazimein.


P’esei su kakumbein por a yega te na e último rònt.

Pero aki el a haña un nòkout promé ku bèl a zona.


Asin’ei Aña Bieu a bai lona i rèfri a kuminsá konta.

Kòrá tabata na rudia ora rèfri a konta yega dies.


Lamentablemente behes a pone Aña Bieu keda vensí,

ku no por a gana e di 12 rònt manera e tabata deseá.


Aña Nobo a kuminsá selebrá ku stadion kompletu

i vürwèrk tabata bai laira kompañá pa budum i bidim!


Pero komo parti dje tim Aña Bieu a aserká Aña Nobo

i komo bon pèrdèdó a felisit’é sin ningun kompleho.


Aña bieu a duna Aña Nobo algun konseho. El a bis’é ku awor akí e ta yòn.

Pero e kòrda ku aki 12 luna lo e ta pará den Aña Bieu su sapatu.


I despues di a kòmbersá un ratu nan a brasa otro i yama otro ayó

Aña Bieu a drenta den su wabi i a start su motor.


Nèt e ora ei a bati 12 or i su outo koló di mamaña       

a kore bai miéntras Aña Nobo a sigui selebrá henter aña.



Saká for di: Djis un pensamentu. Kolekshon di poesia i prosa poétiko. Tomo I; Kòrsou, 2010

Den rin
Pas ku.pdf