© All rights reserved 2011 -  2017      Djispi Productions      Web design by Cathleen Giterson

Djis un Pensamentu

Un E-magazine  pa inspirá, eduká, konsientisá i entretené

Bon Biní
Bienvenido
Welcome
Welkom Djispi

Buki: Introdukshon


Introdukshon


Kerido mayor/edukadó,


Bo dilanti bo tin un bunita buki ku 101 rima mashá spesial pa kompartí ku bo yu/alumno i ku bo por keda usa pa diferente aña ku ta bin.

Ku e buki akí bo por siña bo yu/alumno diferente tipo di rima. Siña rima ta mashá bon mes pa un mucha atkirí konosementu i amplia su vokabulario, konsientisá su mes na un manera di wega riba diferente tópiko i pasa tempu na un manera alegre.

Bisa rima no ta dushi solamente pa e propio mucha mes, sino tambe pa e siña un amiguitu òf amiguita, i tambe pa abo komo adulto. Ta un ratiku huntu mashá agradabel pa siña otro òf siña di otro.

E rimanan ta abarká diferente tema. Ta trata di flora, founa, teknologia (kòmpiuter, telefòn selular etc.), kurpa humano, aktividat diario, famia, universo, religiosidat i hopi mas.

E buki akí tin shen rima partí den sinku sekshon di kada un 20 rima. Kada sekshon tin sea un, dos, tres, kuater òf sinku strea. E kantidat di strea ta indiká e grado di difikultat di e rimanan. Kemen, e sekshon di un strea ta muchu mas fásil ku e sekshon di sinku strea.

E grupo meta di e buki akí ta muchanan entre 4 pa 8 aña. Por bisa ku e sekshon di un strea ta pa mucha di 4 aña, di dos strea pa mucha di 5 aña, di tres strea pa mucha di 6 aña di kuater strea pa mucha di 7 aña i di sinku strea pa mucha di 8 aña. E partishon den e kapítulonan di strea ta un indikashon. Ta mas ku klaro ku ta keda na kada mayor/edukadó, i na nivel di desaroyo di kada mucha, pa por disidí ta kua grado di difikultat di rima ta apto pa kua mucha.

Partishon di e sekshonnan no tur biaha tin di aber ku largura di e rima, tin biaha ta sierto palabra, kantidat di sílaba òf tópiko poko difísil ta kalifiká e grado di difikultat.

Ta p’esei ta rekomendá tur mayor/edukadó pa promé ku siña e mucha e rima, elaborá kuné un tiki sea riba e tópiko òf riba posibel eksperensia ku e mucha tin ku e tópiko den e rima. E vokabulario patras den e buki ta ideal pa yuda den esaki. I e rimanan ta kompañá pa ilustrashon ku tambe ta aportá, na un manera kómiko, pa e mucha kapta esensia di e rima. E bon di e buki akí ta ku segun e mucha ta krese ketu bai lo tin rima adekuá pa e siña.

Pa siña un mucha rima, ta bon pa lesa e rima promé den su totalidat.

Bisa e rima dos pa tres biaha kompletu. Laga e mucha skucha e rima bon e promé i e di dos be. E di tres biaha lesa e rima verso pa verso na bos haltu i enfatisá e palabranan ku ta rima. E mucha tambe ta purba bisa e rima huntu ku e mayor/edukadó. Kòrda laga e mucha ripití na bos haltu.

Pa e mucha keda kòrda e rima despues, ta bon pa dramatisá e rima.

Si ta posibel, laga e mucha lanta para i ekspresá kontenido di e rima.

Di e manera akí e mucha lo keda kòrda e rima despues di tempu, ku muchu mas fasilidat. Ademas, di e manera akí e mucha ta sintié liber, e ta sintié bon i ta habri su mes muchu mas pa kapta tur tipo di informashon nobo. E ta gosa un bòl i ta eksperensiá bisamentu di rima komo un pasatempu masha dushi mes. Di e manera akí principalmente abo komo mayor lo gosa un mundu di e tempu ku abo ku bo yu ta pasa huntu i esaki ta masha bon mes pa boso relashon.

Otro manera pa saka mas benefisio for di e buki akí ta di bòltu blachi huntu ku bo yu/alumno. Pidi e mucha despues pa mustra sierto bestia  òf opheto den e ilustrashon, òf bo mes ta mustra esaki i pidi e mucha

pa menta e nòmber. Na kuminsamentu lo bo tin ku yuda, pero pronto e chikitin mes lo por kontestá. Di e manera akí e ta siña pensa e mes for di tempran.

Stimulá e mucha pa e mes traha rima. Trata na pensa algun palabra ku ta rima i wak si abo komo mayor/edukadó huntu ku e mucha por traha boso propio rima. Tur tópiko ta bon biní. Mas nònsèns e tópiko ta, i mas straño e rima sali, mas boso ta hari i dibertí huntu. Di e manera akí pronto e mucha lo traha su propio rimanan masha prèt mes. Unabes ku e mucha por skirbi, bo por stimul’é pa e skirbi mas tantu palabra posibel ku ta rima i pa despues skohe for di nan i trata na traha su propio rima. Laga e chikitinnan kuminsá promé ku skirbi palabra di ún sílaba ku ta rima, i segun nan ta krese i desaroyá por skirbi tambe palabra mas largu. E mucha lo sintié super orguyoso ora e mes traha un bunita rima i bai siña su amiguitu- i amiguitanan.

E rimanan dediká na e chikitinnan (sekshon di 1 te 3 strea) ta skirbí ku lèter chikí. E otro rimanan (sekshon di 4 i 5 strea) sí ta skirbí ku lèter kapital.

A opta pa laga nòmber propio manera ta skirbié originalmente, pero nòmber di kariño sí ta skirbí segun ortografia di papiamentu.

Naturalmente por personalisá e rimanan ku tin nòmber di hende òf nòmber di animal den nan, pa e muchanan, di manera ku e rimanan akí ta bira mas bibu i mas serka di nan mundu di eksperensia.

Por konsiderá e sekshon di sinku strea tambe komo poema kòrtiku. E muchanan di 8 aña ku ta deseá esei lo por para i deklamá nan tambe.

Di e manera akí e poeta hóbennan akí ta kuminsá familiarisá for di un edat hóben ku e arte literario di deklamá poesia, i asina pokopoko kuminsá kultivá apresio pa literatura.

E buki akí tin mas ku 101 ilustrashon bunita i kómiko ku lo laga e muchanan enkantá. Ora un mucha ku no por lesa ainda ta so, e por djis wak e pinturanan i kòrda e rima ku su mayor òf maestro a siñ’é.

Den Mi stima rima por lesa un biaha mas punto pa punto tur e posibel maneranan pa aserká un rima i pa e mucha siñ’é mas fásil.

Den e anekso por lesa por ehèmpel kon un arko íris ta forma. Mayor/edukadó por lesa e teksto akí pa e muchanan.

Rima 101 ta un rima mashá partikular pasobra e no ta konsistí di lèter sino di diferente blòki di koló. E muchanan lo dibertí según nan ta desifrando e kolónan pa forma e rima úniko akí. Nan mester mira e blòkinan di koló ku lèter bou di nan i yena e lèternan na e lugá korekto den e blòki blanku den e rima di koló. Ora nan ta kla i a forma e rima, nan por konsultá e página ku e solushon pa mira si nan a hasié bon. I nan mes tin mag di pensa un título pa e rima di koló akí.

Pa e muchanan pasa tempu dushi asina usando nan fantasia i hungando ku koló tin dies plachi di klùr na final di e buki.

Ku otro palabra Arko Iris. 101 rima pa mucha ta divertí mucha, eduká i stimulá nan na un manera mashá simpel.


Danki di a skohe Arko Iris. 101 rima pa mucha i tur kos bon.


Bo amiga,


Cathleen Giterson


BUY  BOOKS /CD
NOW!

Intro

Dedikatorio

Kontenido

Kolofòn

Prólogo

Introdukshon

Promo

Flyer

Kaft dilanti

Kaft patras

Presentashon

Entrevista den ‘É notisia’ na CBA television

Djis un rima

Kumpra buki



Festival di Buki di Mucha na

Aruba